Assalamu alaikum warahmatullahi wabarakatu.
Sukkuruki mappuji tenrigangka lao ri olo arajanna Puang Allahutaala,nasabaq pammase-Na nennia pabbere-Na na nawerengi awatangeng nennia adisingeng na topada engka pasilennerengi gauq “Pestival Budaya Tradisional Se-Sulawesi Selatan 2.”
Tau maleqbiku Dewan Juri ,nennia sinning engkae hadereq.
Rideqnanapa naupatterui ada-adakku leqbi riolo maraja dampekka,nasabaq ia tettong riolo aleqbiretta maneng,tiwi akkatta maeloq paletturekki ada-ada apparingerrangeng ri passalenna,”Limpo Atuongetta” na sitongenna deqpa usitinaja ia maelo paletturekki,nasabaq ia tettong ri olo aleqbiretta engkamupa ri laleng mattuntu paqdissengeng na temmaega mupa paqdissengeng uappunnai.Naekia,tarona naulettukekki ,nasabaq iyaro riasenge paqdissengeng “lallo tassidapi” bettuanna weqdingi paqdissengeng nappunnaie seqdie tau naekia deq tosi nappunnai tau lainge,makkutoparo sibalerenna.Narimakkuanna na ro naparellunni sitawa-tawa paqddissengeng.
Tau maleqbiku engkae hadereq.
Passaleng “Limpo Atuongetta”parellu laqdei upangolo,oncopasa lao riolona rangeng-rangekku anaq pattola ri makkukkuange.Nasabaq magai? Sabaqna agi-agi ripeneqdingie ri makkukkuange ri passalenna aengkangenna peretiwie ,engkai ri laleng mappataqgerring kering.Peretiwi rionroie nennia sininna anu makkenyawae ,pada-padanna olokoloq,tanettaneng pedeq engkani macaweq ri apuppurenna nasabaq masolannana limpo atuongetta pedeq lao esso pedeq engkai pedeq ri laleng asolangenna.
Pura riajeppuini makkedae agaro riaseng limpo atuongeng nennia pekkoga gauqta barakkuammengi engkaki tette mampiriwi na rijampa apulanangenna.
Agi-aginna limpo atuongeng pada-padanna watu-watue,uwae nennia pada-padanna hawae,pella kecceqe nennia anu makkenyawae iya engkae ri limpota pada-padanna tanettanenge nennia olokoloqe na ajaq to nariallupai aleta muttamato ri kuae ro.
Agi-aginna limpo atuongetta iya puraenna upaletturekki masseq i assiraga-raganna nennia punnai assimellereng pole riseqdie lao ri anu lainge.Rupa tau,olokoloq nennia tanettaneng, tempeddingi tuo mannennungeng narekko agi-aginna engkai ri laleng asolangeng nennia riapuppurenna.Rapanna tempeqdikki tuo narekko tengengka uwae,olokoloq,nennia tanettaneng.
Rangeng-rangekku iya engkae ri laleng assipaddio-rionge.
Marilaleng maeloq upalettukekki,iya muttamae to passabareng pole ri asolangenna limpota.Ri liputa tegi-tegini mompo abalaq e .Pada ritani labu-labu wae matanna seqdie tau nasabaq riengkana sumpung lolona tallemme ri awana tanah maruttunge nasibawai lenyeqnana onrong accokkongenna.Seqdi amboq sibawa anaqna makkeumuruq seppulo taung lennyeq napakkua soloqna wae lempeq e,sabaq tengengkanana ureq ajukajung matangkung uwae nennia tahangi lebona tanae.
Seqdi anaqlolo mase-mase sojo matojo pura riengkana siangessoni masemmeng natepeqding madising,ri kuae ro seqdi tau pole orena temmaka laqdeq na reseqdena ro seqdi makkunrai malasa uliq. Ri kuae to ro wettue seqdi worowane temmaka kessinng noq pole ri seqdie oto temmaka kessing teteng taseq liseqna ro taseq e ,sureq-sureq wasseleq atteqbangeng aleq.
Deq to naceqdeq rita sulessuretta iya makurange lolongeng wae mapaccing natennajampa lolang mabela massappa uwae paccing.Pada rita toni ro sulessuretta, mannasu kaddoqbari iya tessitinajaenna rianre.
Ri laing onrong cumpani seqdi makkunrai indoq-indoq mattunu warowo iya sikore warowo pole ri anu weqdinge buruq nennia tempedinge buruq pada-padanna damae,marola tattunu, napedeq maerungnana zat ozonge iya engkae ri laleng hawae.
Agi-agi engkae ro ri aseq muttamai saisaqnai pole ri asolangenna alange iya engkae mompo ri liputa.Iyanae mompo nasabaq acaleongetta na addimunrinna ri asolangenna limpota nennia sinninna iya engkae ri limpota,na ripaccappurenna paompoq i anu majaq iya ripeneqdingie nennia tenripineqdingie.
Sulessureng maleqbiku.
Sitongenna anu makkuae ro ri aseq weqdingi deq napoleiki ,rekko meloq maneng muki mainge lao ri atassalang-atassalang iya purae ripegauq.Deq namacai alange, rekko maeloq muki padecengiwi.Peretiwi ileqja tania tau mattetenge denre tase ro punna,naekia peretiwie pada idi punna makkotoparo anaq eppota matti.Pada napoadae to sulessanata, ”Peretiwie tania manaq pole ri neneta naekia inreng pole ri anaq eppota.” Seppulo,duappulo taung purallaloe ,neneta makkeumuruqe pituppulo taung ,tappere-pereni makkae kaleqbong maeloq mattaneng sibatu kaluku iya engkae ri aseqna ceqde colli,neneta ro temmaqdennuangi buah kalukunna ro nalolongeng,naekia iyami napumenasa buah kaluku natanenge ro, anaq eppona mi matti peneqdingiwi.
Sulessureng maleqbiku.
Tentu pada mamminasaki maeloq tuo madising,siraga-raga nennia sipaddio-rio,naekia rimakkuae ro deq nasilalo paleqmi,naekia engkapa reso mattongettongeng, apaq makkedai tau sulessanata,”Resopa natemmangingi na malomo naletei pammase Dewata seuwae”,bettuanna tempeddingi jaji anu ripuminasaie narekko deq tomattongettongeng pogauq i.
Narimakkuanna na ro uellaui lao ri olo aleqbiretta maneng ,oncopasa lao ri rangeng-rangekku anaq pattolae, barakkuammengi tapada siraga-raga mampiriwi apulanangenna nennia asekkekenna peretiwita.Tapammulaini pole ri anu baiccue, rapanna ri limpota barakkuammengi nadeq napole lempeq e nennia limpota weqdingi makudara, tapada siraga-raga mattaneng aju-kajung,pada natunrengie tau malebita,pammarentata”one man one tree“ nennia “go green” bettuanna napumenasaiki pammarentata mattaneng pong aju-kajung pong mariawa sipong aju-kajung tassedqi tau,makkutopa ro naminasai limpo atuongetta makudara pulana.
Makkutopa ro tapada mannennungenni jagaiwi apaccingenna limpota pappada tapabbiasai aleta makkabeang warowo ri onronna,tapabbiasai aleta paccingiwi solongeng engkae ri seqde bolata,barakkuammengi deq nalele lasa namoq demam berdarae,sabaq makkedai warekkadae ,”Lele bulu tellele abiasang”,bettuanna iya ro abiasange mawatangi ripinra.
Makkutopa ro pada kitanenni rilaleng ati mapaccitta ,tapabbiasai aleta sarekkuammeng nadeq tollele temattebbang aju-kajung,tapabbiasai aleta deq tollele tomakkae tanah,mala kessi nennia mala batu nasabaq maeloqmi mappasugi ale ,naekia tiwi abalaq lao ri anaq eppota matti.Seuwa ada sulessana,”Narekko tempeqdikki mappedeceng pong mariawa ajana tomakkasolang.”Ingerangini sulessurekku ! aqdimunrinna atuotta ri peretiwie nennia wettue weqdingi pole onro,sabaq pole komi ri limpo atuongetta iya engkae ri makkokkoae.Rekko puppuni limpota pupputoni ro atuongetta idi anu makkenyawae.
Sulessureng maleqbiku .
Iyanae urapi upalettukekki ,mamuarei weqdingi papole akketujung lao ridi maneng, oncopasa lao ri sulessurekku,rangeng-rangekku anaq pattolae,barakkuammengi weqdiki tungkai limpota.Padatosa adanna tau sulessanae,”Narekko tania idi igana pale,narekko tania ri makkokkoae uppannapa pale?”
Wassalamu alaikum warahmatullahi wabarak
